Waorum

Waorum

Toelichting

Het gedicht ‘Waorum’ werd gemaakt in de periode, waarin we intensief bezig waren met het schrijven van het boek ‘Ootmarsum 1940-1945’. Het heeft betrekking op het drama dat zich afspeelde aan de voet van de Kuiperberg waarbij vier leden uit het Joodse gezin Menco het slachtoffer werden.

Waorum

Ze waddn daor met hun vaar en moor
in nen kealder oonderbracht.
’t Was op ne boerderi’j bie Vass’
Ze zattn daor dag en nacht.

De jong gung d’r mangs stiekem oet;
leup dan deur ’n bos en d’heet.
Hee kon in ’n kealder aajt nich zittn.
Ie wet’ hoo ’t jongs zo geet.

‘Want wie bint Jöddn’, har vaar ees zegd.
‘Majt zölms nich wettn wa’w doot’
En kiek, dat zettn de jong an’t deankn.
Dat begreep hee nich zo good.

Ook snappn hee nich, toen z’op nen aomd
Deur kearls weddn op e jagd.
Met vaar en moor, met breurs en zus
nao Oatmössche weddn bracht.

Daor weddn ze vastzet in twee huk’
Ze mossn daor oet meka.
Zien zuster mos bie moor in ’t hok.
Hee bie zien’ breurs en va.

En wat e zien vaar den nacht ok vreug
Den kon alleen mear zengn:
‘’t Koomp umdar wie Jöddn bint’.
Mear was nich oet te lengn.

’s Mons is hee met zien vaar en breurs
met nen auto vot e gaon.
Hee zag zien zuster en zien moor
bie ne aandere wage staon.

Net boetn de stad mossn zee d’r oet.
Nen soldaot zeè: ‘Dreaj oe um’.
Hee zag ’t geweer, mer kreeg gin kaans
um nog te vraogn: ‘Waorum?’

Ben Morshuis